హైదరాబాద్:
హైదరాబాద్ మహానగరంలోని మాదాపూర్ పరిధిలో ఓ అంతర్జాతీయ వ్యభిచార ముఠా గుట్టును పోలీసులు రట్టు చేశారు. పక్కా సమాచారంతో మాదాపూర్ మరియు కూకట్‌పల్లి ఎస్‌వోటీ (SOT) పోలీసులు సంయుక్తంగా దాడులు నిర్వహించి ఈ ముఠాను పట్టుకున్నారు.
సర్వీస్ అపార్ట్‌మెంట్‌లో పోలీసుల దాడులు
మాదాపూర్ పరిధిలోని చంద్రనాయక్‌ తండాలో ఉన్న ఓ సర్వీస్ అపార్ట్‌మెంట్‌లో వ్యభిచారం జరుగుతున్నట్లు పోలీసులకు సమాచారం అందింది. దీంతో రంగంలోకి దిగిన ఎస్‌వోటీ బృందాలు అపార్ట్‌మెంట్‌లోని రూమ్‌ నంబర్‌ 204పై దాడి చేశాయి. ఈ తనిఖీల్లో ముగ్గురు ఉజ్బెకిస్థాన్ దేశానికి చెందిన మహిళలు పట్టుబడటంతో వారిని పోలీసులు అరెస్ట్ చేశారు.
Also Read - మహారాష్ట్ర సీఎం ఫడణవీస్‌తో సీఎం రేవంత్‌రెడ్డి భేటీ.. తుమ్మిడిహెట్టి బ్యారేజీపై కీలక చర్చలు!
వీసా లేకుండా నేపాల్ మార్గం గుండా వచ్చి..
పోలీసుల ప్రాథమిక విచారణలో పలు ఆసక్తికర విషయాలు వెలుగులోకి వచ్చాయి. అరెస్ట్ అయిన విదేశీ మహిళలు ఎలాంటి పాస్‌పోర్టు, వీసా లేకుండా నేపాల్ మీదుగా అక్రమంగా భారత్‌లోకి ప్రవేశించినట్లు పోలీసులు గుర్తించారు. ఢిల్లీకి చెందిన 'నాయక్' అనే ప్రధాన నిందితుడు ఈ మహిళలను హైదరాబాద్‌కు రప్పించి, సర్వీస్ అపార్ట్‌మెంట్ వేదికగా వ్యభిచారం నిర్వహిస్తున్నట్లు నిర్ధరించారు.
పరారీలో ప్రధాన నిందితుడు
ప్రధాన నిందితుడు నాయక్‌పై పోలీసులు కేసు నమోదు చేసి, పరారీలో ఉన్న అతని కోసం తీవ్రంగా గాలిస్తున్నారు. పట్టుబడిన ముగ్గురు ఉజ్బెకిస్థాన్ మహిళలను న్యాయస్థానం అనుమతి ద్వారా తిరిగి వారి స్వదేశానికి తరలిస్తామని సీనియర్ పోలీస్ అధికారులు వెల్లడించారు.
అలాగే, నగరంలోని సర్వీస్ అపార్ట్‌మెంట్లు, హోటళ్ల నిర్వాహకులు కస్టమర్లను గదుల్లోకి అనుమతించే ముందు వారి గుర్తింపు కార్డులు (ID Proofs) మరియు వివరాలను తప్పనిసరిగా తనిఖీ చేయాలని, నిబంధనలు ఉల్లంఘిస్తే కఠిన చర్యలు తీసుకుంటామని పోలీసులు హెచ్చరించారు.